வாழ்க தமிழ்!

Sunday, July 21, 2013

சென்னையின் கிராம தேவதைகள்! - தினமலர் இணையதளம்

பாமரன்  /  at  8:03 AM  /  கருத்துரை இடுக

                          பழமை அடையாளங்களைத் தொலைத்துவிட்டு இன்று பரந்து விரிந்த தமிழகத்தின் தலைநகராக இருக்கும் சென்னை, அன்று பாரம்பரியம் மாறாத கிராமமாக இருந்தது என்பதன் அடையாளம், இன்றும் இங்கே அருள்பாலிக்கும் கிராம தெய்வங்கள்தான்.
திருவொற்றியூர், மணலி, செங்குன்றம், அம்பத்தூர், திருமுல்லைவாயில், ஆவடி, திருவேற்காடு, மதுரவாயல், அமைந்தகரை, சேத்துப்பட்டு, பெரம்பூர், கொன்னூர், புரசைவாக்கம், எழும்பூர், வண்ணாரப்பேட்டை, தண்டையார்பேட்டை, திருவல்லிக்கேணி, மயிலாப்பூர், அடையாறு, திருவான்மியூர், வேளச்சேரி, பரங்கிமலை, நந்தம்பாக்கம், போரூர், மாங்காடு, பூந்தமல்லி என சிறு சிறு கிராமங்களாகவே அமைந்து இருந்தன. வடபழனி பகுதி புலியூர் கோட்டம் என அழைக்கப்பட்டது. புலியூர் கோட்டத்தில் வேளச்சேரி உள்ளிட்ட கிராமங்கள் அமைந்து இருந்தன.
இந்தக் கிராமங்களுக்கு உரிய தேவதைகள் ஆங்காங்கே சிறப்புப் பெற்று இருந்தன. நாளடைவில் ஏற்பட்ட மாறுபாடுகளில் அவற்றுள் சில பெருந்தெய்வ வழிபாட்டுடன் இணைந்துபோயின. என்றாலும் பல இடங்களில் இன்றும் கிராம தெய்வங்களே எல்லைத் தெய்வங்களாக அருளாட்சி செய்கின்றன.

தர்மராஜா கோயில்கள்: மகாபாரதத்துடன் தொடர்புடைய கதாபாத்திரங்கள் அமைந்துள்ள திருக்கோயில்கள் இவ்வகையில் அடங்கும் பெரும்பாலும் சென்னையின் ஒவ்வொரு பகுதியிலும் தர்மராஜா கோயில்கள் அமைந்துள்ளது. வருடம் தோறும் ஆடிமாதம் காப்புக் கட்டி விரதம் இருத்தல், கூழ் வார்த்தல், தீமிதி, மகாபாரதக் கதை சொல்லுதல் தர்மராஜா கோயில்களில் நடைபெறுகின்றன.
18 நாள் பாரதக் கதை விரிவுரை, காப்புக் கட்டிக் கொண்டு விரதம் இருத்தல், தீ மிதித்தல் ஆகியவை இன்றும் சில தர்மராஜா திருக்கோயில். பிருங்கிமலை என வழங்கப்பட்ட இப்பகுதியில் முன்காலத்தில் இருந்த தர்மராஜா கோயில், பின்னர் கம்பெனியாரின் ஆளுமையின் கீழ்வரப் பெற்ற பிறகு “ஆர்டிலரி’ (ஆயுதம் ஏந்திய காவலர் புழங்குமிடம்) எனப் பட்டப் பெயர் பெற்று விளங்கத் தொடங்கியது.
ஆரம்பக்காலத்தில் மரத்தாலான கிருஷ்ணன், திரௌபதி, போத்து ராஜா புறப்பாட்டுத் தெய்வங்கள் இருந்தநிலை மாறி, துப்பாக்கிக் குண்டுகளை உருவாக்கி வார்க்கப்பட்ட உலோகச் சிலைகளாக மாற்றப்பட்டு புறப்பாடு செய்யப்படுகிறது.
காலமாற்றத்தில் கருவறை, முன் மண்டபம், மகாமண்டபம், ராஜகோபுரம் என விரிவடைந்து விட்டாலும் இந்த திரௌபதி அம்மன் கோயில் இன்றும் ஆர்டிலரி தர்மராஜா கோயில் என்றே வழங்கப்படுகிறது.
சென்னையின் பழைய கிராமம் ஒவ்வொன்றுடனும் தொடர்புடையதாக அமைந்துள்ள தர்மராஜா கோயில்களே கிராம தேவதை கோயில்களாக உள்ளன. இருபது ஆண்டுகளுக்கு முன்பாக மங்களூர் ஓடு அல்லது நாட்டு ஓடு வேயப்பட்ட கோயில்கள் இருந்தன. அவை பெரும்பாலும் தற்போது கட்டட வடிவம் பெற்று, சில ராஜகோபுரம் அமைப்புடன்கூட விளங்குகின்றன.
கிருஷ்ணன் வழிபாடு பெருந்தெய்வ வழிபாட்டுடன் தொடர்புடையதாக இருந்தாலும், கிராமங்களிலும் பஜனைக் கூடங்களாக இடம் பிடித்து உள்ளன. கருவறையில் முன்பெல்லாம் கிருஷ்ணர், ராதா-ருக்மணியுடன் இருக்கும் பெரிய தஞ்சாவூர் ஓவியம் மட்டும் வைத்து பூஜை செய்யப்பட்டு வந்தவை இப்போது கல் விக்ரகங்களுடன், செப்பு விக்ரகங்களுடன் புதுப்பிக்கப்பட்டுவிட்டன!

பிடாரி கோயில்கள்: காளி கோயில்கள் என வழங்கப்படும் பிடாரி கோயில்கள் சென்னையில் வெகு சிலவே! இவை, நன்கு வளர்ந்த கிராமங்களின் வடபால் அமைந்தன.
இவ்வாறு அமைந்தவையே மயிலாப்பூர் கோலவிழி அம்மன் கோயில், திருவொற்றியூர் சுந்தர காளியம்மன் கோயில், மாம்பலம் முப்பாத்தம்மன் கோயில் போன்றவை.
இதைப் போன்ற கிராம தேவதைகள் கோயில்களை கீழ்கண்ட பிரிவுகளில் அடக்கலாம்.
ஆங்காங்கே அமைந்துள்ள புற்றுக் கோயில்களாக இருந்து வளர்ச்சி பெற்றுள்ள நாகத்தம்மன் கோயில்கள், நாக கன்னியம்மன், புற்றம்மன், புட்டாலம்மன் போன்ற பெயர் பெற்றுள்ளன. திருவான்மியூரில் புற்றில் இருக்கும் கன்னியம்மன் என்பதுதான் மருவி புத்தராங்கன்னியம்மன் என்று வழங்கப்படுகிறது.
மேலும் பனையாத்தம்மன், கருக்காத்தம்மன், செல்லியம்மன் என்பவை அந்த அந்தப் பகுதிகளில் அமைந்திருந்த கிராம தேவதைகள் ஆகும்.
பனஞ்சாலைகள் இருந்த பகுதிகளில் வழிபட்டு வந்த தெய்வங்கள் பனையாத்தம்மன் என வழங்கப்பட்டது.
அடர்ந்த வனமாக, கருமையாக இருந்த கிராமப் பகுதிகளில் அமைந்த கோயில்கள் கருகாத்தம்மன் எனப்பட்டது.
“காடுகாள் செல்வி’ என இலக்கியங்களில் வழங்கப்பட்ட காளி, செல்லியம்மன் என வழங்கப்பட்ட தன்மையும் காணப்படுகிறது. இவை தவிர கிராமப் பொது தெய்வங்கள் என்ற அமைப்பின் கீழ்கண்ட தெய்வங்களையும் சேர்க்கலாம்.
பச்சையம்மன் வழிபாடு சென்னையில் பல இடங்களில் இருந்துள்ளன. திருமுல்லைவாயில், மவுண்ட்ரோடு, பாரிமுனை போன்ற பல இடங்களில் பச்சையம்மன் திருக்கோயில்கள் உள்ளன. அவை பரிணாம வளர்ச்சியில் மன்னார்சாமி, மன்னாதீஸ்வரர் என்ற பெயரில் சக்தி வழிபாட்டுடன் சைவ வழிபாட்டை தன் வயப்படுத்தியுள்ளது.
துலக்கானத்தம்மன் என்ற பெயரில் இருக்கும் காளி வழிபாடு, தமிழ் இலக்கிய மரபை ஒட்டிய வழிபாடாக அமைந்ததே ஆகும். துளிர்க்காத வனம்-பாலை நிலமாகும். பாலை நிலத்தின் தெய்வம் கொற்றவை. துளிர்காத வனத்தம்மனே துலக்கானத்தம்மன் எனப் பெயர் பெற்றுவிட்டதைக் காண்கிறோம்.
இவை தவிர, நாட்டின் பல பகுதிகளில் இருந்து வந்து சென்னைக்கு குடியேறிய மக்கள் அவர்கள் ஊர் தெய்வத்திற்கும் இங்கு ஒரு கோயில் கட்டி, கிராம தேவதையாக வணங்கும் பழக்கத்தினைக் கொண்டுள்ளனர்.
மகாபலிபுரத்திற்கு அருகிலுள்ள கடும் பாடி என்னும் பகுதியில் இருந்து வந்த மக்கள், தாங்கள் குடியேறிய இடத்தில் அமைத்துக் கொண்டு வழிபட்ட தெய்வத்தை கடும்பாடியம்மன், கடும்பாடி சின்னம்மன் என்ற பெயர்களில் அழைத்தனர்.
அதேபோல் கோலூரம்மன் என்பது, வட இந்தியாவில் கோல்ஹாப்பூரில் இருந்து இங்கு வந்த தெய்வ வழிபாடாகக் கருதப்படுகிறது. கோல்ஹாப்பூர் அம்மன் என்பதே கோலூர் அம்மன் என திரிந்ததாகக் கூறுகின்றனர்.கர்னாடகா, மகாராஷ்டிராவை ஒட்டிய பகுதிகளில் வணிகர்களின் தெய்வமாக விளங்கிய நிமிஷாம்பாள் என்னும் தெய்வத்திற்கும், சென்னையில் கோயில் கட்டப்பட்டு வழிபாட்டில் உள்ளது. போர்கள் நடைபெறும்போது பாடி வீடு அமைத்து தங்குவது மன்னர்கள் காலத்தில் இந்த வழக்கம். அவ்வாறு பாடி வீடு அமைத்து தங்கிய இடத்தில் இருந்த தெய்வம் பாடிவீட்டம்மன் என்பது நாளடைவில் படவட்டம்மன் எனப் பெயர் பெற்றிருக்கும் தன்மையை காண்கிறோம்.
ஜேஷ்டாதேவி வழிபாடு சென்னையில் வெவ்வேறு பெயர்களில் கிராம தேவதைகளாக வழங்கப்படுகிறது. நுங்கம்பாக்கத்தில் அசலாத்தம்மன் என்ற பெயரில் கிராம தேவதையாக ஆதி அம்மனாக வணங்கப்படுகிறாள். அதே போல் மயிலாப்பூர் கபாலீஸ்வரர் திருக்கோயிலின் குளக்கரையில் ஜேஷ்டாதேவி எனத் தெரியாமலே அது வணங்கப்படுகிறது.
பிராமி, வைஷ்ணவி, மாகேஸ்வரி, கௌமாரி, இந்திராணி, சாமுண்டி, வராகி என்ற ஏழு தாய்த் தெய்வங்கள் வழிபாடும் கிராம தேவதை வழிபாடாகவே சென்னையை பொறுத்தவரை வழங்கப்பட்டு வருகிறது. வேளச்சேரி, ராமாபுரம், திருவான்மியூர் ஆகிய இடங்களில் செல்லியம்மன் என்றும், வேறு பெயர்களாலும், இவர்கள் வணங்கப்படுகிறார்கள். பெரிய கோயில்களில் திருவிழா என்றால் முதலில் இந்த தெய்வங்களுக்கு படையல் இட்டு, காப்பு கட்டும் வழக்கமும் இருந்து வருகிறது.
நீரோடு தொடர்புடைய கிராம தேவதைகளும் சென்னையில் வணங்கப்படுகிறது. கங்கையம்மன் நீரோடு தொடர்புடைய தெய்வம், சலவைத் தொழில் நீரோடு தொடர்புடைய தொழில். கங்கையம்மன் தங்கள் வாழ்வுக்கு ஆதாரமாக இருப்பதால், அவளை வணங்கும் பழக்கம் சலவை தொழிலாளர்களிடம் உள்ளது. சலவை தொழிலாளர்கள் அதிகம் வசிக்கும் பகுதிகளில் கங்கையம்மன் கோயிலை காணலாம். சைதாப்பேட்டை, பெசன்ட் நகர், போன்ற இடங்களில் கிராமதெய்வமான கங்கையம்மனுக்கு கோயில் உள்ளது.
குறிப்பிட்ட பகுதி மக்கள் தங்கள் வசிக்கும் தெருவில் அமைத்து கொண்ட தெய்வங்கள் வீதி அம்மன், திருவீதி அம்மன், தெரு வீதி அம்மன் எனவும் வழங்கப்பட்டன.
அங்காளபரமேஸ்வரி, மாரியம்மன், பவானியம்மன் என்னும் தெய்வங்கள் நோய் தீர்க்கும் கிராம தெய்வங்கள், இவையும் வெளியூரில் இருந்து கொண்டு வரப்பட்ட தெய்வங்கள், எல்லம்மன் என்பது எல்லையம்மன் என மருவி அழைக்கப்படுவதாக சொல்லப்படுகிறது. எல்லையம்மன் தனி செய்வமாக இருந்தாலும், எல்லம்மன் என்பது நல்ல பெண் தெய்வம் என்ற பெயரில் வழங்கப்படுகிறது. தவிர மாரியம்மனே கருமாரியம்மன், எல்லமுத்து மாரியம்மன், மொண்டியம்மன் என அடைமொழி சேர்த்து சில ஊர்களில் அழைக்கப்படுகிறாள். வருடத்திற்கு ஒரு முறை அசைவ உணவு, படைக்கப்பட்டு வணங்கப்பட்டு வந்த இந்த தெய்வங்களுள் சில தற்போது சைவத்திற்கு மாற்றம் பெற்றுள்ளன.
உள்ளூர் பூசாரியால் படையலிட்டு பூஜை செய்யப்பட்டு வந்த கிராம தேவதைகளுக்கு தற்போது வேதமுறைப்படி பூஜை வழிபாடுகள் நடத்தப்பட்டு வருவதையும் காணலாம்.
கிராம தேவதைகளின் வளர்ச்சியை நாகரிகத்தின் வளர்ச்சி நிலையாகத்தான் நாம் கருத வேண்டும்.
-இரா.இரகுநாதன்.

பகிர்
இயல்(கள்): , , , இதழ் வெளியான நாள்: Sunday, July 21, 2013

0 கருத்து(கள்):

காப்புரிமை © 2013 தமிழ்மொழி - தமிழால் நாமும் நம்மால் தமிழும் பயனுற வேண்டும் இத்தளத்தை நிர்வாகிப்பது தமிழ்மொழி.வலை
. சேவை வழங்குநர் பிளாக்கர்.